LAOAG CITY – Natakawan ti maysa a pagtaengan ti 300 a ribu a pisos iti Barangay Juan iti ili ti Solsona.
Basar iti Solsona Municipal Police Station, nagkamang ni Trishia Mae Johanna Dela Cruz, agtawen ti 27, awanan asawa, negosiante ken residente ti Barangay Juan iti ili ti Solsona iti kuerpo ti pulisia tapno ipakaammo iti otoridad nga idi Marso 21, 2025 iti agarup alas siete ti rabii, nakaawat ti inana a ni Emely Dela Cruz ti papel manipud iti katulongda a ni Ginalyn Juan, agtawen ti 53, naasawaan, residente ti Barangay Lydia iti ili ti Marcos.
Nailanad iti papel nga ipakpakaammo ti katulong ti pamilia nga innala ti mapukpukaw a kuarta ken nagballaag pay daytoy nga agannad isuda gapu ta nakaroda unay kenkuana.
Mainaig iti daytoy, apaman a nabasada iti linaon ti papel ket napan kinita ni Trishia ti kuartona ket ditoy a naduktalanna a ti steel vault-na a naglaon ti agarup 300 a ribu a pisos a nakaikabil iti rabaw ti lamisaanna ket mapukpukaw.
Naammoan a ti naitaray a kuarta ti biktima ket koleksionna iti negosiona.
Idi Marso 23, 2025 iti agarup 2:30 ti malem, ti nasao a vault ket nabirukanda iti drainage canal iti sangoanan ti pagtaenganda a nadadaelen ken nakitada ti sumurok 70 a ribu a pisos iti asideg ti balayda a nakaluban ti kaldero.
Kabayatanna, maibasar iti ala ti Close Circuit Television wenno CCTV camera ket nakita ti katulongda a ni Ginalyn ti nangipurwak ti papel iti sangoanan ti pagtaenganda.
