LAOAG CITY – Inlawlawag ni Barangay Chairman Myar Gonzales iti Barangay Gaang iti ili ti Currimao ti reklamo a maipagarop nga adda ti naglibas a kabarangayan na manipud iti nakalockdown a lugar.
Segun kenni Gonzales, napan ti kabarangayan na iti maysa a pagtaengan iti Barangay Victoria iti nasao met laeng nga ili ken inawat met ti maseknan gapo ta isu ti pagub-ubraan na.
Inbatad na a bayat nga adda iti Barangay Victoria ti kabarangayan na a maipagarop a naglibas ket saan dan a mabantayan gapo ta saan dan a sakupen ti lugar a pagtatalinaedan na iti agdama.
Kunana nga idi tinawagan na ti kapitan ti Barangay Victoria ket naduktalan na a ti ayan ti kabarangayan na ket paset iti Barangay San Simeon iti nasao met laeng nga ili.
Inpetteng na a sakbay a naipatungpal ti lockdown ket nabalakadan da dagiti kabarangayan da ken dagiti APOR ket mabalin da nga agtalinaed iti sabali no awaten laketdi ti pagturungan da.
Mainaig iti daytoy, inlawlawag ni Gonzales a ti makitkita dagiti kabarangayan da nga indibidual a rumrumuar ket volunteer ti barangay da ken ti maseknan ti mapmapan aggatang kadagiti kasapulan dagiti kabarangayan na a nakalockdown.
Kabayatanna, naglikudan ni Gonzales a ti nakaakaran dagiti nagpositibo a kalugaran na ket ti maipagarop a panagsusugal ken adda ti naangay a pasken no diket contact da dagiti ummunan a nagpositibo.
Iti agdama ket addan ti 16 nga aktibo a kaso ti covid-19 iti barangay da.
