LAOAG CITY – Naminpinsan a nauram ti maysa a resort a kukua ni Mr. Leomar Aguilar iti Barangay Burayoc iti ili ti Pagudpud.
Daytoy ti inrakurak ni Senior Fire Officer 2 Jeofrey Pascua, ti chief investigator iti Bureau of Fire Protection iti ili ti Pagudpud.
Segun ken ni Pascua, ti resort ket addaan ti 14 a guests manipod iti Metro Manila idi napamasamak ti uram.
Inlawlawag ni Pascua a basar iti imbestigasyon da, napan amin dagiti guests iti resort iti baybay, ngem adda ti inbati da a nakasaksak a powerbank.
Kuna na a basar iti maysa nga aglaklako iti shell iti lugar ket sakbay ti uram ket adda ti nangngeg na a bimtak iti uneg ti resort ken possible a daytoy ti nakasaksak a powerbank.
Inbatad na a kalpasan a naawat da ti report nga adda ti maur-uram a resort ket nagresponde da a dagus ngem idi makadanun da iti lugar ket kaguduan ti resort ti nauram.
Inpalgak na nga alisto a nagkayamkam ti apoy gapu ta kaadoan a nausar para iti pannakaaramid iti resort ket light materials ken napigsa pay ti angin.
Innayon na a mapatta-patta nga umabot iti 945 a ribo a pisos ti balor dagiti nadadael iti nasao a resort, malaksid pay kadagiti dimmapo a kagamitan dagiti guests.
Mainaig iti daytoy, inpakaammo ni Pascua a nagpaot iti maysa ket kagudwa nga oras sakbay a naan-anay a nasebseban da ti apoy, babaen iti panagtitinnulong da kadagiti kameng ti Bureau of Protection iti ili ti Bangui ken Dumalneg.
Kabayatanna, kuna ni Pascua a kalpasan ti napasamak nga uram ket insigidan a nagrubwat dagiti guests ti nauram a resorts para iti panagsubli da iti Metro Manila nga awan pulosen dagiti naiyawid da a gamitda.
Iti agdama, agtultuloy paylaeng ti imbestigasyon ti Bureau of Fire Protection seknan iti pannakauram ti nasao a resort.
