LAOAG CITY – Nasarakan ti bangkay ti maysa a lakay iti uneg ti kwartona iti Barangay 2 iti ili ti San Nicolas.
Ti nasao a lakay ket saan pay a masinunuo no ana ti kompleto a detalye na ngem rumrumuar a daytoy ket agtawen ti sumurok 70.
Daytoy ket agnanaed iti maysa a family house no sadinno nga adda daytoy iti akin baba a paset ti pagtaengan ken adda dagiti agkaskasera iti ngatona.
Segun kadagiti agkaskasera, nakitada pay laeng daytoy idi Lunes, Hulio 13 ken saanen a nakita pay iti agmalem ti Martes, Hulio 14.
Gapu iti daytoy, nagsiddaaw dagiti agkaskasera gapu ta adda pay iti nabangsit a naangotda ket ditoy a naduktalan ti nasao a bangkay.
Insigida met nga intawag dagiti agkaskasera iti pamilia ti senior citizen ket nagturongda met iti nasao a pagtaengan.
Apaman a makita daytoy, ket patien ti pamilia nga adda ti napasamak pay a nangitunda ti pannakatay na gapu ta nakadata daytoy a nakangato ti ima na ken adda ti dara ti agongna.
Naamoan a ti senior citizen ket adda pay ti asthma-na no sadinno nga agag-agas daytoy.
Iti agdama, manarimaan pay laeng ti imbestigasion nga insigida nga inwayat ti Philippine National Police (PNP) San Nicolas.
