LAOAG CITY – Naglikudan ni Mr. Ferdinand Coloma iti Brgy Sta. Rosa iti ili ti Sarrat ti alegasyon a lima ti ipaspasada na a tricycle.
Segun kenni Coloma, 15 ti tricycle na ngem lima laeng a prangkisa ti nainagan kenkuana ken dagiti dadduma ket nakainaganen kadagiti annak na.
Inlawlawag na nga uray lima ti nakainagan kenkuana ket dua laeng ti ipaspasada da idinto a dagiti dadduma ket sabalin ti mangimanmaneho.
Iti met panagturong ti grupo ti Bombo Radyo Laoag iti Southern Sarrat Tricycle Operators Association iti nasao nga ili ket naduktalan a saan a nasayaat ti pannakapinta iti kulay orange ti maysa a tricycle nga ipaspasada ni Coloma.
Daytoy ket kalpasan met ti rakurak ni Sannguniang Bayan Member Esteban Agoy, mangidadaulo ti Commitee on Transportation iti ili ti Sarrat a saan a mabalin a maipasada ti maysa a tricycle nu saan a napintaan iti orange gapo ta daytoy ti ordinansa ti ili da.
Inbatad pay ni Agoy a naireklamo a datin ni Ferdinand Coloma gapo ta 10 nga unit ti tricycle ti nakainagan kekuana nga isu iti inaksyonan da iti napalabas.
Mainaig iti daytoy, inpanamnama ni Agoy a bisitaen danto ni Coloma tapno solusyonan iti sabali manen nga isssyu pakaseknan kenni Coloma.
Kabayatanna, kuna ni Mr. Reynante Godoy, Presidente ti Southern Sarrat Tricycle Operators Association a saan a naipakammo kadakuada a saan a mabalin nga ipasada ti saan a napintas ti orange a sidecar ti tricycle.
Ummuna iti daytoy, adda ti reklamo a naawat ti Bombo Radyo a maipagarop nga ipila amin ni Coloma dagiti lima a tricycle na ken no addan ti pasaheros ti maysa ket itulod na a dagus ken ni agsubli iti terminalan da ket makargaan to manen ti sabali a tricycle na ken daytoy ti isublat na manen nga imaneho nga isu ti pakaap-apektaran dagiti dadduma a tricycle driver.
