LAOAG CITY – Mairugi ditoy siudad ti Laoag intuno bigat, Mayo 1 agingga iti Mayo 30 ti supplemental immunization kadagiti ubbing.
Daytoy ti inpakaammo ni Ms. Jenalyn Sambrano, health education officer ditoy siudad.
Segun ken ni Sambrano, ti panagbakuna ket pagbinnuligan ti City Health Office ken ti Department of health kas agtultuloy a programa ti nasao nga opisina.
Inlawlawag na a kangrunaan a maibakuna ket ti polio vaccine ken dagiti makaawat iti daytoy ket dagiti 0-59 months old.
Mainaig iti daytoy, inbatad na a mabakunaan met kontra iti measles, rubella dagiti siyam a bulan agingga iti 59 a bulan ti tawen na.
Immunan nga inpetteng ni Sambrano a ti nasao a panagbakuna ket agserbi a nayun a proteksyon kadagiti ubbing malaksid iti immuna a routine immunization.
Kabayatanna, inpakaammo ni Sambrano a ti panagbakuna ditoy siudad ket umuna a maiysuwat kadagiti fixed sites idinto nga iti maudi a dua a lawas ti Mayo ket maidanon iti kada balay ti panagbakuna.
