LAOAG CITY – Nagpanawagan ni Senate Minority Leader Alan Peter Cayetano ti naun-uneg ken komprehensibo nga imbestigasion iti maipagarup nga iregularidad kadagiti proyekto a flood control nga imbes nga isentro laeng ti atension iti partial report ti Senate Blue Ribbon Committee.
Inpetteng ni Cayetano a saan nga umdas ti panangtalantan iti pakpakauna a report no saan met a sakupen ti sibubukel a ladawan ti isyu.
Kunana nga adda ti peggad a malimitaran ti imbestigasion no ti agbalin a pagibasaran laeng ket ti draft report nga inparuk-at ni Senate President Pro Tempore ken Blue Ribbon Committee Chair Panfilo “Ping” Lacson idi Pebrero nga agingga ita ket saan pay a pirmado ti umdas a bilang dagiti senador iti plenario.
Inadmitirna nga uray nabasan ti sumagmamano senador ti nasao a report, saanda pay nga immannugot iti sumagmamano a linaon isut gapuna a masapul ti naig-iget a panangtingiting.
