LAOAG CITY – Nagpositibo iti dengue ti maysa kadagiti umaayam iti football team ti rehiyon uno sumagmamano nga aldaw sakbay ti pormal a panaglukat ti Palarong Pambansa 2023.
Segun ken ni Mr. Elcie Vetog, Coach ti football team ti rehiyon uno, simmangpet ti nasao nga atleta iti lugar a saan a nasayaat ti marikriknana agingga a naggurigor daytoy rason a naitaray iti ospital ket ditoy a nakumpirmaran a positibo daytoy iti sakit a dengue.
Gapu iti daytoy, saan a mailibak ti Coach a dakkel a pukaw ti nadakamat nga atleta gapu ta ibilangda daytoy a sanggir ken mangipapaay ti natibker a puersa iti grupo.
Nupay kasta, inbatadna a nakaruaren iti balay-pagagasan ti atleta ken agtultuloy nga agpapaimbag daytoy.
Mangnamnama ti football coach ti rehiyon uno a makapagpartisipar ti nasao nga atleta kadagiti sumarsaruno nga ay-ayam.
Iti agdama, saan pay a masinunuo no ayanno ti nakaalaan ti umaayam ti sakit a dengue.
Mainaig iti daytoy, mangnamnama met ni Mr. Gio Patrick Aspejo, Center Forward ti grupo nga agbalin a napintas ti sasaaden ti panawen ita nga aldaw nga isu ti maudi nga aldaw sakbay ti laban tapno maka-ensayo dagitoy iti mismo a venue no sadino a pakaisayangkatan ti ay-ayam gapu ta para kadakuada ket dakkel a karit ken pannubok ti napigsa a tudo.
Kabayatanna, mangrugi ti umuna nga ay-ayam ti grupo intono bigat, Agosto 1 iti oras ti alas syete ti bigat iti Ateneo football field iti Ateneo de Manila kontra iti Mindanao 2.
