LAOAG CITY – Boluntaryo nga insuko ti maysa a kandidato para Sangguniang Bayan Member iti ili a Pinili ti expired ken ag-expire a paltog ken dagiti bala da iti istasyon ti pulisya ti nasao nga ili.
Saanen nga innaganan ni P/S/Inps. Jeffrey Taccad Hepe ti Pulisya ti nasao nga ili ti kandidato ngem dagiti insuko na ket maysa a 12 gauge shotgun ken dua a kalibre 45.
Kuna ni Taccad a ti shotgun kety ag-expire pay laeng ti lisensiya inton Feb. 2019 idinto a dagiti dua a kalibre 45 ket expired ti lisensiya na idi June 2015.
Inlawlawag ti opisyal a ti boluntaryo a panangisuko ti kandidato dagiti nasao a paltog ket bunga ti naiget a kampanya da kontra kadagiti expired wenno awan ti lisensiya na a paltog babaen ti Oplan Katok.
Mainaig iti daytoy, ginutigot manen ni Taccad dagiti adda pay ti ilemlemmeng na nga expired wenno awan ti lisensiya na a paltog a nalalaing no isuko da laengen dagitoy wenno saan ket ipadalan da ti search warrant operation.
