LAOAG CITY – Natay ti maysa a lalaki kalpasan a nalmes iti irigasyon iti paset ti Barangay Parparuruc, Vintar, Ilocos Norte.
Nabigbig ti biktima a ni Nixon Domingo y Ramos, agtawen iti 31, baro, taga Brgy. Union, Claveria, Cagayan ngem agdama nga agnanaed idiay Barangay Parparuruc iti nasao nga ili.
Segun ti report, napan nagdidigus iti lugar ti biktima kadwa na dagiti kakasinsin na a da Christopher Domingo y Dalere, addaan iti umno a tawen, naasawaan ken ni Abet Dalere, agpapada dagitoy a residente ti nasao a barangay.
Nupay kasta, bayat ti panagdidigus da ket nagdive ti biktima ken nakigtot laengen dagiti kakasinsin na idi saandan a mauray a lumung-aw manipod iti uneg ti danom.
Kalpasan iti sumagmamano a minutos a panagbiruk da Christopher Domingo ken Dalere ket nakita da laengen ti biktima a na-stock ti ulo na iti metal nga adda ti babaen ti matartarimaan a rangtay a sakop ti nasao nga irigasyon.
Naitaray ti biktima iti Governor Roque Ablan Senior Memorial Hospital (GRASMH) ditoy ciudad ti Laoag babaen ti pannakailugan na ti ambulansya iti ili a Vintar a nairana a limmabas iti nasao a lugar ngem niadeklar a pimmusayen.
Iti imbestigasyon, naamoan a nakainom ti nasanger ti biktima idi napasamak ti insidente.
