LAOAG CITY – Nakastreken iti pagilian ti maysa manen a bagyo a napanaganan ti “Josie” no sadinno a nakita ti sentro na iti kaadayo a sumuruk-kumurang a 1,090 kilometro abagatan ti Eastern Visayas.
Ti bagyo ket addaan ti kapigsa ti angin nga umab-abot iti 65 a kilometro iti kada oras asideg iti tengnga na pasaray pumigsa agingga iti 80 a kilometro iti kada oras.
Aggargaraw daytoy iti direksyon nga agpadaya-amianan iti kapardas a 20 a kilometro iti kada oras.
Basar iti Philippine Atmospheric, Geophysical and Astronomical Services Administration (PAGASA) saan nga agpaot ti bagyo iti uneg ti Philippine Area of Responsibility gapu ta possible a rumuar a dagus ken agbalin manen a maysa a Low Pressure Area.
Saan pay a makaapektar iti kondisyon ti panawen iti pagilian.
