LAOAG CITY – Nakaawat ti 100 a ribo a pisos iti sabali manen a centenarian ditoy ciudad ti Laoag.
Daytoy ti inpakaammo ni Ms. Erlinda Agustin, ti mangidadaulo iti Senior Citizen Affairs Office ditoy ciudad.
Binigbig na ti centenarian a ni Nana Maria Nolasco Pascual, residente iti Brgy. 28 ditoy ciudad ti Laoag.
Ni Pascual ket nagkasangay iti maika-100 a tawen na idi Disyembre 22, 2024.
Personal nga inyawat ti local chief executive ditoy ciudad ti Laoag ti tseke a nakaipalaonan ti insentibo para iti nasao a centenarian, ken naimatangan daytoy ni Barangay Kagawad Juliet Valiente.
Kuna ni Agustin a nagyaman ni Pascual iti naawat na nga insentibo nga ibilang na a dakkel a tulong para kadagit kasapulan na iti inaldaw aglalo ket addaan ti 46 nga appoko.
Mainaig iti daytoy, inbatad ni Agustin a ti patien ni Pascual a nangitunda kenkuana iti atiddog a panagbiag ket gapu iti pammateg ken naan-anay a panangtaripato kenkuana ti pamilya na.
