LAOAG CITY – Nakaleave ni Mrs. Marites Romerosa, ti maestra a maipagarop a nangkabil kadagiti estudyante na ti Hilario Valdez Memorial Elementary School idiay ciudad ti Batac sipud pay idi maikatlo a lawas ti Pebrero agingga intono Marso 30 ita a tawen.
Daytoy ti kinompirmaran ni Dr. Joan Corpuz, ti Schools Division Superintendent idiay ciudad ti Batac.
Inbatad na a ti panagbakasyon ni Romerosa ket inlungalong da a mismo tapno saanen a bumara ti isyu a nakainaigan na kangrunaan na dagiti nagannak dagiti maseknan nga estudyante.
Sungbat daytoy ni Corpuz kalpasan a naidanun iti Bombo Radyo a sumsumrek latta ni Romerosa iti nasao a pagadalan isut gapuna nga agbubuteng dagiti ubbing a maipagarop a dinangran na.
Kabayatan na, inpakaammo ni Corpuz a nangisumitir ti report ti nasao a pagadalan kangrunaan na ti prinsipal a ni Mr Luis Gajeton para ti naan-anay a pannakatratar ti nasao nga isyu.
Innayon ni Corpuz a manarimaanen ti imbestigasyon ti DepEd-Regional office ken isudanto ti agdesisyon no ania ti rumbeng a maipataw a pannusa ken ni Romerosa.
