LAOAG CITY – Linawlawagan iti Bombo Radyo ni Mrs. Maia Albano iti Dingras, Ilocos Norte ti inpost na iti facebook kontra ti maysa a nurse nga agpapaay iti ospital ti met laeng nasao nga ili.
Ni Albano ket mangisursuro iti Dingras National High School-Barong Campus iti Barangay Barong iti ili a Dingras.
Segun ken ni Albano, nagturong da iti ospital tapno mapan na pakita ti busali na, ngem saan a napintas ti pannakisarita kadakuada ti saanen a nainaganan a nurse.
Innayon na a ti ad-adda pay a nagsakitan ti nakem na ket ti maipagarop a binubugkaw a pannakisarita ti nurse iti anak na a babai nga agtawen ti 12.
Kuna pay ni Albano nga apaman a nakadanun da iti balay da ket saanna latta mailiwliwag ti inaramid kadakuada ti nurse isut gapuna a nagpost iti social media kangrunaan na iti facebook.
