LAOAG CITY – Maysa a baro nga smart underwear ti naaramid dagiti researchers tapno otomatiko a mabilang no mamin-anu nga umotot ti agsusuot para iti panagsukisok ti gut bacteria ken digestive health.
Daytoy ket inaduloan ni Brantley Hall, associate professor iti University of Maryland a gagemna nga tingitingen no kasano makaapektar ti taraon, partikular ti fiber iti produksion ti gas iti bagis.
Mainaig iti daytoy adda bassit nga agbukel a device nga ikabit iti likod ti underwear. Addaan daytoy ti electrochemical sensord a maka-detect ti hydrogen maysa kadagiti gas a maararamid no maproseso ti gut bacteria ti taraon ken rumuar kas otot.
Imuna nga inusar daytoy iti Human Flatus Atlas, maysa a research project no sadinno insuot dagiti nakipaset ti smart underwear iti sumurok-kumurang 12 nga oras iti kada aldaw iti maysa lawas.
Ditoy a naduktalanda a 32 a daras ti average ti panag-otot iti uneg ti 12 nga oras.
Kabayatanna, saan pay daytoy kas medical device ngem mabalin daytoy makatulong iti panagsukisok dagiti pasiente a makapaspasar iti kabag, panagsakit ti boksit ken sobra a gas.
