LAOAG CITY – Addan ti maysa nga Overseas Filipino Worker (OFW) ti kumpirmado a karaman kadagiti rinibo a tattao a natay iti idadayyeg ti magnitude 7.8 a gingined idiay Turkey.
Daytoy ti report ni Bombo International News Correspondent (BINC) Ghie Gonzales iti Ankara, Turkey.
Segun ken ni Gonzales, ti nasao nga Overseas Filipino Worker ket taga Baguio City ket agpapaay kas nanny iti nasao a pagilyan.
Inbatad na a basar iti impormasyon da ket nakalasat ti amo a babai ken aywan na nga ubing ti nasao nga Overseas Filipino Worker ngem ti kadwa na a pimmusay ket ti amo na a lalaki.
Innayon na a malaksid iti natay ket adda pay ti sumagmamano nga Overseas Filipino Workers iti nasao a pagilyan a nagtalinaed a mapukpukaw kalpasan ti napigsa a panagdayyeg iti lugar.
Kabayatanna, inpakaammo ni Gonzales nga iti agdama ket makumikum da nga aguk-ukkon kadagiti ipaay da a tulong kadagiti kadaraan a nadigdigra idiay Turkey kangrunaan na dagiti makan, badbado ken dadduma pay.
Iti agdama, umaboten iti nasurok a 10 ribo a tattao ti kumpirmado a natay idinto a rinibo a sabsabali dagiti nagtalinaed a mapukpukaw kalpasan ti idadayyeg ti napigsa a gingined idiay Turkey.
