LAOAG CITY – Nasaplitan ti ima ti maysa a lalaki kalpasan a napugsat ti maysa a waya ti kuryente a mapan iti pasdek panganan iti sango ti Bangko Sentral ng Pilipinas iti paset ti Barangay Callaguip iti ciudad ti Batac.
Nabigbig ti biktima a ni Mr. Rolando Rubio, maysa a tricycle driver ken residente ti Barangay 16 iti nasao a ciudad.
Segun kenni Rubio, natamaan ti akin-kannawan nga ima na kalpasan ti pasamak ken adda ti naperdi a parte ti motorsiklo na.
Inlawlawag na a nakita dagiti pasahero na a nagrisak nga ummuna ti waya ti kuryente sakbay a napugsat.
Nupay kasta, kalpasan a naipakaammo daytoy iti Ilocos Norte Electric Cooperative (INEC) ket dagus da nga inaksyonan ti pasamak.
