LAOAG CITY – Nagkampeon ti Municipal Disaster Risk Reduction and Management Office iti ili ti Pasuquin iti kaunaan a Rescue Olympics nga insayangkat ti Provincial Government of Ilocos Norte iti babaen ti Provincial Disaster Risk Reduction Management and Resiliency Council.
Mainaig iti daytoy, napalaus ti ragsak dagiti kameng ti Municipal Disaster Risk Reduction and Management Office iti nadakamat nga ili.
Naipaayan dagitoy ti gunguna a 30 ribu a pisos, tropio ken sumagmamano a kagamitan a mausar dagitoy iti rescue operations.
Nagun-od ti Municipal Disaster Risk Reduction and Management Office iti ili ti Marcos ti first runner-up a nangabakanda ti 20 ribu a pisos, tropio ken kagamitan a mausarda iti rescue operations.
Kabayatanna, second runner-up ti Cluster 2 a bukbuklen ti Municipal Disaster Risk Reduction and Management Office iti ili ti Carasi, Dingras, Piddig, San Nicolas ken Sarrat.
Mamati ni Gob. Matthew Marcos Manotoc a ti pannakaipatungpal a naimbag dagiti nangab-abak kadagiti naipaay kadakuada a “scenario” iti panangisalakanda kadagiti biktima ti mangipamatmat a nakasagana dagitoy a mangannong a naimbag iti trabahoda nangnangruna kadagiti pannakapasamak dagiti saan a napakpakadaan nga insidente.
Maipalagip a naisayangkat ti Rescue Olympics iti igid ti baybay nga adda iti sakop ti Brgy. Victoria iti ili ti Currimao.
