LAOAG CITY – Nangiyuswat ti post-assessment ti Municipal Disaster Risk Reduction and Management Office iti ili ti Sarrat kalpasan ti iduduprak ti Bagyo Uwan.
Daytoy ti inpakammo ni Mr. Marvin Ganal, ti mangidadaulo ti nasao a pangopisinaan.
Segun kenni ganal, kadua da dagiti kapitan iti amin a barangay iti ili ti Sarrat pakairamanan ti mangidadaulo ti Rural Health Unit (RHU), Philippine National Police (PNP) ken sumagmamano nga opisyales ti ili da.
Inbatad na a napagsasaritaan da ti nagbalin nga epekto ti Bagyo Uwan kadagiti barangay.
Naamoan nga awan met ti dakkel a perdisyon ti Bagyo kangrunaan na iti benneg ti agrikultura ken imprastraktura.
Mainaig iti daytoy, nakaawid metten iti pagtaengan da dagiti ummunan nga inbakwit da a tallo a pamilya manipud iti Barangay 1; dua a pamilya iti Barangay 4 ken saggaysa a pamilya manipud iti Barangay 6 ken Barangay 22.
Kabayatanna, inpasigurado ni Ganal a nakaalerto da latta ken nakasagana da no adda man ti agkasapulan ti tulong.
