LAOAG CITY – Nagsuek ti maysa a military helicopter ti Pakistan nga asideg iti Muzaffarabad ti kabisera ti Pakistan-administered Kashmir a nakatayan ti amin a nakalugan iti daytoy basar iti Inter-Services Public Relations (ISPR).
Basar iti report, maysa nga Mi-17 helicopter ti army aviation ti nagsuek kabayatan ti panag-takeoff daytoy gapu iti maipagarup a “technical fault.”
Saan nga insigida a dinakamat ti militar ti eksakto a bilang dagiti pimmusay ngem kinumpirmaranna nga awan ti nakalasat.
Insigida a nagresponde dagiti rescue ken recovery team iti lugar ti insidente ken nabilin a mangbukel ti board of inquiry tapno maammoan ti pudno a namunganayan ti aksidente.
Naammoan a kadagiti naglabas nga aldaw, naiget ti seguridad iti Muzaffarabad kagiddan ti plano a tignay protesta ti maysa a grupo kalpasan nga inpawil daytoy iti babaen ti anti-terror laws.
Maipalagip nga idi Domingo ket saan a bumaba iti 11 nga indibidual ti natay iti rinnupak iti nagbaetan ti pulisia ken dagiti mangiwaywayat ti tignay protesta iti Rawalakot ti kabisera ti Poonch district.
Kabayatanna, kas sungbat, nagiwaras dagiti otoridad ti federal paramilitary troops ken nangipatungpal ti naiget a travel advisory iti sibubukel a rehion.
