LAOAG CITY – Nakaawaten ti pammalubos ti Mariano Marcos Memorial Hospital and Medical Center (MMMH&MC) iti ciudad ti Batac manipod ti Department of Health nga agoperar kas COVID testing laboratory kas paset iti pananglaban iti panagwaras ti COVID-19.
Iti panangsertipikar ti DOH babaen ti Health Facilities and Services Regulatory Bureau, nangrugin a nangisayangkat ti MMMHMC ti rapid PCR (polymerase chain reaction) tests babaen ti GeneXpert machine a maus-usar para iti pannakatest ti tuberculosis PCR ken human immunodeficiency virus (HIV) viral load.
Inbatad ni Dra. Maria Lourdes K. Otayza, Medical Center Chief II a ti operasyon ti testing laboratory ket babaen iti MMMH&MC ken provincial government of Ilocos Norte (PGIN).
Nangidonar ti provincial government ti PCR machine ken dadduma pay nga equipment idinto a gimmatang met ti nasao nga ospital dagiti supplies, biosafety equipment ken iti pannakaipaay ti refresher training para kadagiti certified staff.
Inlawlawag ni Otayza a ti Department of Pathology and Laboratories-Molecular Biology Section iti nasao nga ospital ket masapul a pumasa iti proficiency examination ken competency assessment tapno agbalin a licensed, independent hospital-based Covid-19 testing laboratory.
Mainaig iti daytoy, nakumpleto pay dagiti sumagmamano a medical technologists ken pathologists iti MMMH&MC ti blended learning training iti “Xpert Xpress on SARS-CoV-2” nga insayangkat ti National Tuberculosis Reference Laboratory-Learning and Development Section idi Mayo.
Mabalin nga agawat ti testing facility ti MMMH&MC kadagiti specimens para iti testing manipod iti Lunes agingga iti Biyernes malaksid iti Huwebes iti alas-otso ti bigat agingga iti alas-5 ti malem.
Naamoan a ti MMMHMC ti maikadwa a DOH-retained hospital a na-accredit ket isu iti kaunaan nga agusar ti first GeneXpert technology para ti Covid-19 testing ditoy Region 1.
