LAOAG CITY – Inbatad ni Dr. Cecil Atilano, City Sports Director iti Zamboanga City ken mentor ni Olympics gold medalist Hidilyn Diaz a dua a bulan pay ti palabsen sakbay nga agawid daytoy iti nasao a ciudad.
Iti eksklusibo nga interview ti Bombo Radyo Laoag kenni Atilano, manarimaan ti panagsagana ken panagplano da para iti siginifacant homecoming ni Diaz.
Inlawlawag na a sakbay a makaawid daytoy ket ado pay laeng met dagiti aramiden na idiay Manila ken panag-courtesy call na kadagiti sumagmamano a personalidad kas panagyaman iti suporta.
Inpalgak na a gapo ta daytoy ti ummuna a gundaway a naipatukar ti National Anthem ti Pilipinas iti Olympics, kalikagom na a maipasimudaag ti nationalism ken patriotism bayat ti panangsarabo dan to kenni Diaz.
Kunana nga amin nga establishimento ken opisina wenno ahensya ket maikkan ti bandera ti Pilipinas agingga a dumanon ni Diaz idiay Zamboanga, malaksid laeng dagiti tarpaulin.
Inpasigurado na pay nga ita ket matuloyen ti datin a plano ti lokal a gobierno ti Zamboanga a maipatakderan ti monumento ni Diaz.
Kunana nga agpaot laeng ni Diaz idiay Zamboanga ti dua agingga iti tallo nga aldaw sakbay nga agsubli idiay Manila.
Mainaig iti daytoy, linagip manen ni Atilano ti dati a kasasaad ni Diaz idi ubing pay daytoy no sadinno a ti kinarigat iti biag ti rason a nagpursige daytoy agingga a nakaiyalat ti medalya agingga a nagbalin a kaunaan a gold medalist iti Olympics.
Dinakamat na a ni Diaz ket maysa nga ehemplo kadagiti ado a Pilipino ken atleta nga agpursige iti arapaap iti biag.
