LAOAG CITY – Kinumpirmaran ni Mr. Hilario Manding, ti mangidadaulo ti National Bureau of Investigation (NBI) ditoy ciudad ti Laoag a simmuko iti opisina da ti Most Wanted Person a naggapo iti Estados Unidos.
Binigbig ni Manding ti simmuko a ni Randolph Gavino alyas Roy, naggapo idiay Hawaii ken residente iti Barangay Torre iti ili ti Currimao, ken sumangsango ti kaso a murder.
Segun kenni Manding, nakikoordinar kadakuada ti representante ni Gavino para iti panagsuko na babaen met laeng iti balakad ti abogado ti maseknan.
Kunana nga idi Nobyembre 30 iti 2:20 ti malem ket sinabet da ni Gavino iti Laoag International Airport.
Mainaig iti daytoy, inbatad ni Manding a basar iti palawag ni Gavino kadakuada ket nagturong idiay Hawaii tapno isuna ti mangtulong kadagiti kakadua na nga ummunan a natiliw.
Inlawlawag ni Manding a ni Gavino ti maysa kadagiti suspek iti pannakatay ti konsehal iti ili ti Currimao.
Innayon na nga apaman a simmuko ni Gavino ket inturn-over da a dagus iti RTC Branch 17 iti ciudad iti Batac.
Nupay kasta, nangipila ti motion ti abogado ni Gavino para iti pannakaipakustudyar pay laeng ti akusado iti NBI agingga nga awan ti pammilin ti korte.
