LAOAG CITY – Nagdinnungpar ti maysa a motorsiklo ken pick-up iti Airport Road iti paset ti Barangay Bengcag ditoy ciudad ti Laoag.
Nabigbig dagiti nakalugan iti motorsiklo nga isuda Remigio Guillermo ken ni Janssen Bartolome, agpada a residente iti Barangay 29 ditoy ciudad ti Laoag idinto a ti nangiturong ti Pick-up ket ni Ruby Anne Cabuyadao, residente iti Barangay Mangato-B ditoy ciudad.
Basar iti inisyal nga imbestigasyon ti Philippine National Police ditoy ciudad, agpadaya ti motorsiklo idinto nga ag-Uturn met ti Pick-up nga aggapo iti igid ti kalsada idi napasamak ti insidente.
Rumrumuar a napardas ti taray ti motorsiklo ken gapu iti kapigsa ti impact iti pannakaidungpar na iti Pick-up ket nagsagaba da Guillermo ken Bartolome ti sugat iti nagduduma a paset ti bagi da.
Naitaray met a dagus dagiti biktima iti ospital para iti naan-anay a pannakataming da.
Manamnama ti panagsasarita dagiti karaman iti insidente apaman a makaruwar dagiti dua a nakalugan iti motorsiklo iti ospital tapno maamoan no mano ti balor dagiti nadadael iti dua a behikulo.
