LAOAG CITY – Natay ti driver ti motorsiklo kalpasan iti panagdinnungparda iti maysa a tricycle iti national highway ti Brgy. Manalpac iti ili ti Solsona.
Segun ken ni P/Cpl. Lloyd Dizor, Imbestigador ti Solsona Municipal Police Station, nabigbig ti pimmusay a nangiturong ti motorsiklo a Rusi Craken nga agmaris ti nangisit a ni Roger Ganot, agtawen iti 33, naasawaan, construction worker idinto a nabigbig ti kinalubbonna a ni Eugene James Dela Cruz y Ramos, agtawen iti 34, awanan asawa, construction worker nga agpada dagitoy a residente ti Brgy. Manalpac iti ili ti Solsona.
Inbatadna a nabigbig met ti nangiturong ti tricycle a ni Aristothel Tabrilla y Samoy, agtawen iti 44, naasawaan, self employed ken residente ti Brgy. Manalpac iti ili ti Solsona ken adda ti tallo a kaduana a nakalugan iti tricycle pakairamanan ti agtawen iti dua nga ubing nga agpapada a residente ti Brgy. Puttao iti ili ti Solsona.
Inlawlawagna a basar iti inwayatda nga imbestigasion, kabayatan a dumaldalyasat ti nakamotorsiklo iti Josefa Llanes Escoda national highway ti Brgy. Manalpac iti ili ti Solsona nga agturong nga agpa-daya ket kellaat a napukawan ti kontrol ti manibela a nangitunda ti panagdinnungparda iti tricycle nga agturong met nga agpa-laud.
Gapu iti daytoy, kunana a naipurwak dagiti nakamotorsiklo ken nagsagabada ti sugat iti ulo ken sumagmamano a paset ti bagida idinto a nagsagaba ti minor injuries dagiti nakalugan iti tricycle.
Mainaig iti daytoy, inpalgakna a dagus a naitaray amin dagiti maseknan iti desgrasia iti Piddig District Hospital para iti naan-anay a pannakatamingda ngem saan a nagbayag ket naiyakar dagiti naglugan iti motorsiklo iti Mariano Marcos Memorial Hospital and Medical Center iti siudad ti Batac.
Naammoan a gapu iti kinapigsa ti impact ti desgrasia ket rumrummuar iti imbestigasion a pimsuak ti utek ti driver ti motorsiklo.
Innayonna a saan a nakasuot ti helmet ken high visibility vest dagiti nakamotorsiklo idi napasamak ti desgrasia ken awan pay ti lisensia ti driver ti motorsiklo.
