LAOAG CITY – Inrakurak ni Mr. Charles Curammeng a dati a Barangay Captain iti Brgy. Laureta iti ili ti Solsona nga agpaidasig kas Mayor iti nasao nga ili para iti 2025 Midterm Elections.
Segun kenkuana, napanunutanna nga agpailayon ket gapu met laeng kadagiti kailianna iti ili ti Solsona a gagemna a tumulong para kadakuada.
Inbatadna a dakkel daytoy a responsibilidad ngem ammona a babaen kadagiti papagayam ken pamiliana nga adda iti likudanna ket maaramidna dagiti rumbeng nga aramidenna.
Kunana nga iti agdama ket awan met pay ti nangiyendorsar kenkuana manipud iti Team Marcos.
Inlawlawagna nga adu ti planona a kalikagumna a maipatungpal iti ili ti Solsona a pagsayaatan dagiti naruay nga umili.
Innayonna nga adda dagiti dadduma a gundaway a dagiti ar-aramidenna a tignay ket maapektaran iti maris pulitika.
