LAOAG CITY – Inpakaammo ni Police Capt. Eddie Suyat, hepe ti PNP Paoay a panggep iti apal iti panagbiag ken ti right of way ti rumrumwar a motibo ti pannakapaltog dagiti agina iti Brgy. Laoa iti nasao nga ili.
Daytoy ket basar iti pagimbestigar dagiti kameng ti PNP Paoay iti insidente.
Kuna ni Suyat a nagtungpal ti suspek ken dagiti persons of interest iti panangimbitar kadakuada ti PNP para iti imbestigasyon.
Nupay kasta, inbatad na nga awan pay ti naiyestablisar no adda ti pannakainaig da Marvin Lagundino, anak ti suspek, kenni Pacito Perdido, iti pammaltog.
Segun kenni Suyat, naglikudan dagiti dua nga adda ti pannakainaig da iti pammaltog a nakatayan ni Ester Baclig ken nakasugatan ni Roque nga anak na.
Mainaig iti daytoy, agtultuloy a maag-agasan ti anak a Baclig iti Intensive Care Unit iti Mariano Marcos Memorial Hospital and Medical Center iti siudad ti Batac.
Kabayatanna, inlawlawag ni Police Capt. Suyat a saan da a narekobre ti paltog nga inusar ti suspek idinto a ti narekobre dagiti kameng ti SOCO ket siyam a kapsula ti kalibre 45 a bala.
Segun kenni Suyat, possible nga agkiddaw da ti verification iti biang ti Firearms and Ordnance Division no adda ti nakalisensya kenni Lagundino a kalibre 45 a paltog ken mangkiddaw da iti Search Warrant tapno mabirokan ti nausar a paltog.
Kamaudian na, inbunannag ni Suyat a target ni Candelario Lagundino ni Roque Baclig idinto a naganawa ti ina na a pimmusay kabayatan ti nabara a diskusyon da Roque ken ti suspek.
Maisagsaganan ti maipila a reklamo a Murder ken Frustrated Murder kontra kenni Lagundino.
Naamuan a dati a kameng ti Philippine National Police ni Lagundino ken dati nagserbi iti biang ti intelligence unit iti PNP Region.
