LAOAG CITY – Nagbalinen a linteg ti pannakaipataw ti nadagdagsen a pannusa iti asinoman a karaman iti agricultural economic saboteurs kas ti smuggler, profiteers, hoarders ken kartel ti produkto agrikultura ken panagkalap.
Iti maysa a seremonia iti Malacañang, inrakurak ni Sen. Cynthia Villar a pinirmaan ni Pres. Ferdinand Marcos Jr. ti Republic Act No. 12022 wenno ti Anti-Agricultural Economic Sabotage Act.
Karaman a nagatendar dagiti sumagmamano a Senador ken Congressmen pakairamanan dagiti sumagmamano nga opisial ti Department of Agriculture ken agricultural private groups.
Nakailanad iti linteg dagiti krimen ti panangsabotahe iti ekonomia ti agrikultura iti aniaman nga aramid wenno aktibidad a makaapektar iti ekonomia iti babaen ti panangpartuat ti artipisial a kinakurang, panangitandudo ti nalabes a panagangkat, panagmanipula ti presio ken suplay ken dadduma pay.
Inbatad ni Villar, Chairperson ti Committee on Agriculture, Food, and Agrarian Reform ken sponsor ti gakat iti Senado a masapol ti nadagsen a dusa tapno malappedan ti smuggling ken panangabuso kadagiti market practices a pangta kadagiti agricultural producers, kadagiti consumer ken ti pakabuklan nga ekonomia.
Iti babaen ti linteg, ti dusa a tungpal-biag a pannakaibalod ken multa ti tallo a daras a balor dagiti produkto agrikultura ken panagkalap a subject ti krimen ket maipataw iti asinoman a tao nga agaramid ti agricultural smuggling, agricultural hoarding, agricultural profiteering ken adda ti pakainaiganna iti cartel.
