LAOAG CITY – Timulong ti maysa a waste collection company idiay Bitonto, Italy tapno mabirokan ti maysa a winning lottery ticket nga agdagup ti 1 million Euros (wenno sumurok-kumurang P70 million) kalpasan nga aksidente daytoy a naibelleng ti makinkukua.
Segun ken ni Roberto Nicola Toscano, direktor ti nasao a waste collection company a Sanb, gimmatang ti maysa nga saan a nainaganan a residente ti Bintonto ti Million Day ticket para iti draw idi Hulio 30.
Kalpasan ti draw, inpa-scan ti nasao a ticket owner ti ticket-na tapno maamoan no nangabak daytoy ngem rimuar a “non-payable,” daytoy iso nga inbellengna ti ticket-na iti pagbasuraan.
Napalabas ti sumagmamano nga oras, naamoanna a rimuar amin dagiti numerona iti draw no sadinno ket ti “non-payable” a nakitana idi ini-scan-na ti ticket-na ket kayat na a saoen a dakkel unay ti premyona a masapolna nga i-claim ti napangabakanna iti mismo a kompanya ti nagtayaanna.
Idi nagsubli ti akinkukua ti ticket iti nagibellenganna tapno biroken ti inbbellengna a ticket ket awanen ti nasao a nagibellengenna ken nakolektar daytoyen ti garbage collector.
Gapu iti daytoy, nakipagkomunikar isuna iti Sanb tapno mabirukanna ti lotto winning ticket-na.
Kalpasan ti naiget a panangsapolda, nabirukan dagiti empleado ti winning ticket iti uneg ti napigis a bag kaduana dagiti dadduma pay a lotto ticket.
