LAOAG CITY – Namnamaen ti publiko a mahilig nga agbiahe ti nanginngina a plete inton sumaruno a bulan kabayatan a pina-upgrade ti Civil Aeronautics Board (CAB) ti fuel surcharge level para iti domestic ken international flights.
Iti maysa nga advisory, inbatad ti Civil Aeronautics Board a ti passenger ken cargo fuel surcharge para iti domestic ken international flights ket naikeddeng iti Level 5 para inton Marso 1 agingga iti 31, 2025, manipud iti agdama a Level 4.
Nadakamat a ti nasao a fuel surcharge ket maysa nga opsyonal a bayad, malaksid iti pangibasaran a plete a mabalin nga ipasa dagiti airline kadagiti pasahero tapno masubbot dagiti gastos gapu iti panagbalbaliw ti presio iti jet fuel.
Naammoan nga ur-urnosen ti Civil Aeronautics Board dagiti nayon a singir iti gasolina maipanggep iti panaggaraw ti presio ti jet fuel.
Iti babaen ti Level 5, dagiti pasahero ket agbayad ti P151 agingga iti P542 kas fuel surcharge para iti domestic flights, depende iti distansia ti biaheda.
Kabayatanna, iti babaen iti agdama a Level 4, ti pampasahero a fuel surcharge ket adda iti nagbaetan ti P117 ken P342 para iti domestic flights, depende iti distansia idinto a para kadagiti international flight a naggapu iti Pilipinas, ti nayon a bayad ket manipud iti P385.70 ken P2,867.82.
