LAOAG CITY – Binigbig ti Federal Bureau of Investigation ti gunman a nangpaltog ken ni dati nga United States President Donald Trump iti State of Pennsylvania.
Ti suspek ket nabigbig a ni Thomas Matthew Crooks, agtawen iti 20, residente ti Bethel Park, Pennsylvania, USA.
Isuna ket maysa a nursing-home employee ken agtartrabaho kas dietary aid ken agisagsagana kadagiti taraon.
Nagturpos ni Crooks iti Bethel Park High School idi 2022.
Segun iti maysa kadagiti schoolmate daytoy a ni Jason Kohler, isuna ket nakapasar ti panag-bully idi high school ken masansan a mangmangan.
Inbatadna nga uy-uyawenda isuna ti wagas iti panagaruatna no sadinno masansan nga agus-usar ti hunting outfit.
Basar iti nairuar a resulta iti inisyal nga imbestigasion ti US Secret Service, ni Crooks ket rehistrado kas maysa a Republican ken mapapati nga agmaymaysa a nangiwayat ti pammaltog.
Rumrummuar a sumagmamano metten a daras a nakita dagiti witness ti nasao a suspek ken inpadanonda kadagiti otoridad maipanggep iti mapagat-atapan a garawna.
Basar iti Butler Police, sumagmamano kadagiti report maipapan iti ‘suspicious activity’ a nirespondeanda pakairamanan ti report seknan ken ni Crooks.
Mapapati a nagusar ni Crooks ti maysa nga AR-style rifle iti pammaltog no sadinno ti AR-15 ket maysa a semi-automatic rifle.
Naammoan a ti AR-15 ti high-velocity bullets ket kabaelanna ti panag-triple a kapaspas ti maysa nga handgun wenno pistol.
Maysa kadagiti klase ti paltog ket ti panagbalin nga accurate daytoy iti baet ti adayo a distansia. Ti rooftop a mapapati a nagpuestoan ni Crook ket adda ti kaadayona a sumurok-kumurang a 150 meters manipud iti podium no sadino nakatakder ni Trump.
Ti 150 meters ket isu met ti distansia a maus-usar a markmanship training dagiti US Army recruit tapno maikkanda ti M-16 rifle.
Kabayatanna, kagiddan ti assassination attempt ken ni Trump ket napaltugan pay dagiti sumagmamano a tattao a nangitunda ti pannakatay ti maysa nga indibidual ken panagbalin a kritikal dagiti dua pay.
Mainaig iti daytoy, nabigbig ti natay a ni Corey Comperatore, agtawen iti 50 ken maysa a volunteer firefighter.
Mapapati nga insarapana ti bagina tapno protektaran ti pamiliana idi napasamak ti pammaltog.
Nabigbig met dagiti dua a kritikal ga isuda David Dutch, agtawen iti 57 ken James Copenhaver, agtawen iti 74 nga agpada nga agnanaed iti Pittsburgh no sadino addadan iti nasayaat a kasasaad.
