LAOAG CITY – Posible a mangipangato ti risgo iti obesity ken high blood pressure kadagiti agtutubo a Pilipino ti sedentary lifestyle, basar iti panagadal ti Food and Nutrition Research Institute.
Inbatad ni Food and Nutrition Research Institute science research specialist Patricia Isabel Amita a ti panagbalin a nasalun-at ket saan laeng nakabasar iti umno a nutrision ken regular nga ehersisio no diket iti panangliklik iti unhealthy habits kas ti kinakurang iti turog, nalabes nga screen time ken kinaawan ti pisikal nga aktibidad.
Kunana a ti panaggigiddan ti tallo nga aramid ket ad-adda a mangipangato ti peggad iti obesity ken hypertension.
Inlawlawagna a saan laeng a dagiti natataengan ti makapaspasar ti hypertension no diket karaman pay dagiti adolescents wenno dagiti agtutubo nga agtawen ti 10 agingga 17.9 ket mabalin met a maaddaan ti high blood pressure.
Basar iti 2023 national nutrition survey, 7 a porsiento kadagiti Filipino teenagers ti hypertensive.
Dinakamatna a mabalin pay a makapasar ti stroke dagiti agtutubo.
