LAOAG CITY – Pagtaltalinaeden dagiti otoridad idiay Los Angeles dagiti residente nga agbalin nga alerto gapu ta saan pay a nalpas ti peggad ti wildfire.
Inbatad ni Los Angeles Fire Chief Kristin Crowley a namnamaen ti napigsa nga angin a mangitunda ti panagwaras ti wildfire iti lugar.
Inwaras metten dagiti otoridad dagiti bumbero iti maaw-awagan nga “high-fire-risk areas” idiay Los Angeles ken saan pay a nagsardeng dagiti otoridad ti panangkita kadagiti pagtaengan tapno makabirok kadagiti residente a nairaman a nauram.
Adda ti sumurok 50 nga indibidual ti naarestarda a mangipapilit a sumrek kadagiti pagtaengan ken agtaktakaw.
Immunan a nagballaag ti National Weather Service nga agtultuloy ti Critical to Extremely Critical a Fire-weather conditions agingga inton bigat.
