LAOAG CITY – Nangrugin a fully booked ti naruay nga hotel idiay Mexico kagiddan iti panangrugi ti 2026 FIFA World Cup.
Segun ken ni Bombo International News Correspondent Renald Villaluz manipud idiay Mexico, sumagmamano a lawas sakbay a pormal a mangrugi ti sports competition ket adun dagiti simmangpet kadagiti hotel a dandanin a mapunno dagitoy.
Inbatadna nga ad-adda pay a pinaigetan dagiti otoridad ti panagbantay ken panangipaay ti seguridad kadagiti tattao no sadinno nga adda dagiti sumagmamano a kalsada ti napaserraan para iti nasao nga aktibidad.
Kunana a dupudop dagiti tattao iti lugar nga asideg iti pakaisayangkatan ti naindaklan nga ay-ayam a nangitunda ti nairot a taray ti trapiko.
Inlawlawagna a daytoy ti maikatlo a daras nga ag-host ti Mexico ti FIFA World Cup nga immuna idi 1970, simmaruno idi 1986 ken ita a tawen 2026.
Innayonna nga adda pay ti sumagmamano a pagadalan ti half day tapno makabuya iti umuna nga ay-ayam ti 2026 FIFA World Cup kas panangipaay ti suporta iti pagilianda a Mexico.
Kabayatanna, naammoan nga adda ti 48 a pagilian ti agbibinnalubal para iti 2026 FIFA World Cup.
