LAOAG CITY – Patien ni Barangay Chairwoman Beverly Juan iti Barangay Lagui-Sail ditoy ciudad ti Laoag a saan a kabarangayan na dagiti agibelbelleng ti basura iti kalsada partikular iti Vintar road.
Segun kenni Juan, nabayagen a problema iti barangay da daytoy ken uray kanayun da nga agdalos no dagiti dadduma a tattao a mapan agibelleng iti sanitary landfill ket saan dan nga idanon iti mismo a pagbasuraan.
Inlawlawag na nga adda dagiti opisyales ti barangay pakairamanan dagiti barangay tanod nga agronda ngem awan ti matiliwan da nga agibelbelleng ti basura gapo ta mabalin nga irana dagiti maseknan no awan ti makakita.
Malaksid iti daytoy, kuna pay ni Juan nga iti nasao a paset ti barangay da ket nasipnget ken adayo kadagiti pagtaengan.
Nupay kasta, inpasigurado ti kapitan a solbaren da daytoy ken agronda da tapno adda ti matiliwan da no siasinno ti agibelbelleng iti paset ti barangay da.
Immapela pay ni Juan nga adda kuma ti disiplina ti tunggal maysa para iti pagsayatan ti barangay da ken ti ciudad ken maidanon kuman iti sanitary landfill dagiti basura da.
Mainaig iti daytoy, kuna ni Juan a daytoy ti kangrunaan a pagsakitan ti nakem da gapo kadagiti naiwara a basbasura.
Kabayatanna, maladingitan ni Engr. Manuel Aurelio, ti OIC City Engr. ditoy ciudad ti Laoag kadagiti maam-ammoan na a reports manipud kadagiti nagduduma a barangay seknan iti basura kangrunaan na iti Barangay Lagui-Sail, Barangay 3 ken Barangay Vira.
Inbatad ni Aurelio a no iti Vintar road ti mapagsasaritaan, idi laeng malem kalman ket napan nagpidot dagiti garbage collectors iti basura ken naipan iti mismo a dumpsite ditroy ciudad.
Nupay kasta, kunana a nakigtot idi nangegan nga adda manen ti report mainaig iti basura iti nasao a paset ti lugar.
