LAOAG CITY – Inpasingked ni Retired Brigadier General Jimmy Rivera Sr. iti PDRRMO-Isabela a nasurok 152,000 nga indibidual dagiti naibakwit gapu iti iduduprak ti bagyo Ulysses iti nasao a probinsya.
Segun kenkuana, dagiti bakwit ket manipod 37 nga ili pakiramanan ti dua a siudad ti Isabela.
Inbunnanag na a nangato ti lebel ti danom nga intunda ti bagyo isut gapu na nga ado dagiti naapektaran a pamilya.
Mainaig iti daytoy, inbatad na a kangrunaan a naapektaran iti panaglayus ket ti agrikultura nu sadino nga agarup 7,000 agingga iti 8,000 nga ektarya a nagmulaan ti pagay ken mais ti naminpinsan a nalayus.
Kuna na mapatta-patta nga umabot iti 14-milyon a pisos ti balur dagiti pagay a nadadael, 30 milyon a pisos dagiti nadadael a mais idinto nga agarup 64 milyon a pisos ti balur dagiti nadadael a high-value crops.
Kabayatanna, inpakaamo na nga iti laksid ti nakaro nga epekto ti bagyo ken ti pandemiya a mapaspasaran ket agtultuloy ken ikarkarigatan ti gobierno probinsyal ti Isabela ti mangipaay ti tulong kadagiti residente.
