LAOAG CITY – Umaboten iti 288 a tattao dagiti natay ken 850 dagiti nasugatan iti panagdidinnungpar dagiti tren idiay Odisha state, India.
Daytoy ti kinumpirmaran ni Sudhanshu Sarangi, tidirector general iti fire department iti Odisha.
Segun kenni Odisha’s chief secretary Pradeep Jena, nasuork a 200 nga ambulansya ti nagturong iti nasao a nakapasamakan ti insidente partikular iti Balasore district.
Basar iti inisyal nga imbestigasyon, mapapati a nadiskaril ti pampasahero a tren sakbay a naidungpar iti maysa pay a tren iti adjacent track.
Inbatad ni Indian Railways a dagiti dua a tren a karaman iti insidente ket ti Coromandel Express ken ti Howrah Superfast Express.
Naamoan nga umabot metten iti nasurok 100 a doktor ti agtitinnulong nga adda iti lugar.
Kabayatanna, nakipagladingit met ni Indian Prime Minister Narendra Modi iti pamilya dagiti biktima ken inpasigurado na a maipaay amin ti kasapulan dagitoy ken uray dagiti nasugatan.
Daytoy met ti maibilang a kagrabean a panagdinnungpar dagiti tren iti nasao a pagilyan ken mapagam-amkan a ngumato pay ti bilang dagiti natay.
