LAOAG CITY – Inpakaammo ni Atty. Joel Gines, Provincial Election Officer a dumanon iti 430,658 dagiti rehistrado a botante iti intero a probinsia ti Ilocos Norte.
Segun kenkuana, daytoy ket maibasar iti datosda idi Hulio 15 ita a tawen isu a manamnama a manayonan pay ti bilang dagitoy nangruna ket adda dagiti kimmamakam a nagparehistro idi kalman a maudi nga aldaw ti voter’s registration.
Inbatadna nga umdasen ti naipaay a pawayway kadagiti umili tapno agparehistro gapu ta kas idi kalman nga isu ti maudi nga aldaw ti panagparehistro ket saan a naitantan iti baet iti pangta ti Bagyo Julian.
Kunana nga awan ti rason dagiti indibidual a saan a nakarehistro gapu ta adda met ti insayangkatda nga off site registration-da no sadinno a rummuarda iti opisinada iti Sabado pakairamanan ti holidays.
Malaksid iti daytoy, inlawlawag ni Atty. Gines a dimmanon pay ti Commission on Elections kadagiti bukud a pagtaengan dagiti umili ken nangipatungpalda ti mall registration.
Innayonna a ti panangipila ti Certificate of Candidacy dagiti kandidato ket nangrugi ita nga aldaw, Oktubre 1 agingga inton Oktubre 8.
