LAOAG CITY – Maisayangkat ti Nationwide Simultaneous Earthquake Drill ita nga aldaw ti Huwebes, Hunyo 18.
Segun iti Office of the Civil Defense (OCD), katulungan da iti nasao a drill dagiti member agencies ti National Disaster Risk Reduction and Management Council (NDRRMC).
Makipaset met dagiti opisyal iti ceremonial pressing ti button iti Camp Aguinaldo iti Quezon City kas senyales ti panangrugi ti nationwide earthquake drill.
Sarunwen daytoy ti opisyal a panangiwayat ti Harmonized National Contingency Plan para iti Highly-Intensity Earthquake iti Greater Metro Manila Area.
Iti nasao a contingency plan, nakadasar ti coordination plan para iti national government, regional disaster risk reduction and management councils ken dagiti lokal a gobierno iti kangitingitan ti napipigsa a gingined karaman ti “Big One.”
Naipalaon pay ditoy a dagiti ahensya kadagiti kaparanget a rehiyon a pakairamanan iti Region 3 ken 4 ket maiwaras iti Metro Manila ken mangipaay ti dagus a search, rescue ken operations support.
Isayangkat pay ti tabletop exercise no sadinno nga ipatungpal ti simulation iti itatama ti magnitude 7.2 a gingined gapu iti panaggaraw ti West valley Fault, a mangsubok iti kinasagana ken koordinasyon ti national ken regional response systems iti kangitingitan ti napipigsa a gingined a mabalin a makaapektar iti Metro Manila ken kaparanget a rehiyon.
