LAOAG CITY – Awan ti nakita a kumpirmado nga impormasyon ti National Bureau of Investigation (NBI) maipanggep iti pakabigbigan ti maibagbaga nga “hitman” a a maipagarop a kinontrata ni Vice President Sara Duterte tapno dangran da Presidente Ferdinand Marcos Jr., First Lady Liza Araneta-Marcos, ken dati nga House Speaker Martin Romualdez.
Daytoy ti inbatad ni NBI Regional Director Atty. Jeremy Lotoc iti maikapat nga aldaw ti impeachment trial ni VP Sara.
Segun ken ni Lotoc, pinadas ti NBI nga amwen ti maipagarop a pakabigbigan ti kinontrata a tao iti babaen ti panangala ti impormasyon manipod kadagiti tattao nga adda ti pakainaigan iti online press conference no sadinno nga inrakurak ti Bise President ti kontrobersyal a video.
Nupay kasta, kuna ni Lotoc nga awan ti naala da nga umdas ken beripikado nga impormasyon tapno mabigbig ti maibagbaga nga “hitman.”
Inbatad ni Lotoc a sineryoso ti NBI dagiti inrakurak ti bise presidente gapu ta naggapo a mismo iti maikadwa a kangatoan nga opisyal ti pagilian.
Kabayatanna, naglikudan met ti defense team ni Sara Duterte ti alegasyon nga adda ti kinontrata a tao tapno ipatungpal ti nasao a plano.
Inkalintegan ti abogado ti depensa a ni Atty. Mark Vinluan, mangidatag da kadagiti ebidensiya tapno paneknekan ti kabibiangan da.
Innayon ti depensa a mangidatag da kadagiti testigo mainaig iti maipagarop nga “Operation Romanov” a maibagbaga a plano kontra met ken ni Vice President Duterte ken ti pamilya na.
