LAOAG CITY – Kinumpirmaran ni Police Major Eddie Suyat, ti chief of police iti ili ti Paoay a masapol ti negatibo a resulta ti antigen test dagiti aglaklako manipud kadagiti sabali nga ili.
Sungbat daytoy ni Suyat kalpasan nga ado dagiti saludsod no masapol ti test wenno saan no mapan da aglako iti nadakamat nga ili.
Malaksid iti negatibo nga antigen test result, masapol pay ti sertipikasyon nga aggapo iti barangay a naggapoan dagiti aglaklako a mangibagbaga a dagitoy ket aglaklako ken mailanad a saan da nga exposed iti covid-19 patient wenno saan a mamonmonitor.
Segun kenni Suyat, adda dagiti aglaklako manipud iti ili ti Currimao, ditoy ciudad ti Laoag ken dadduma pay.
Inbatad na a kas wagas a panangsalwad iti tiendaan ken dagiti residente ket nagdesisyon da a masapol nga adda ti negatibo nga antigen test sakbay da a mapalubusan nga aglako.
Mainaig iti daytoy, kuna ni Mrs. Shiela Galano, ti Municipal Administrator iti nadakamat nga ili a ti validity iti antigen test nga isu ti maipresentar iti border control ket pito nga aldaw.
