LAOAG CITY – Binalakadan ti Bulacan Provincial Health Office dagiti Bulakenyo nga ammoen dagiti sintomas ken dagiti umno nga impormasion mainaig iti Nipah Virus.
Iti report ti Bulacan Provincial Health Office (PHO) Public Health, awan ti nairekord a kaso ti Nipah Virus iti pagilian iti agdama ngem napateg daytoy a mammoan no kasano daytoy nga agwaras ken kasano daytoy a liklikan.
Mabalin a maipasa iti tao ti nasao a virus kas ti direct contact iti infected nga ayup wenno iti rugit ti dara ken isbo daytoy, panagkonsumo ti kontaminado a taraon ken close contact iti tao nga addaan ti sakit.
Nadakamat a dagiti sintomas ti virus ket ti maaddaan ti gurigor, narigat a panaganges, panaguyek, sakit ti ulo, panag-vomit ken panagbudo ti karabukob.
Gapu iti daytoy, ti virus ket mabalin a mangitunda ti impeksion iti pagnaan ti angin ken iti nakaro a kaso ket panagmaga ti utek ken encephalitis.
Naammoan a tapno maliklikan ti sakit ket ugalien ti umno a panagbuggo ti ima, siguradoen a naugasan a nasayaat ken naluto a naimbag ti taraon, panagtalinaed a nadalus ti aglawlaw ken liklikan ti pannakilangen-langen kadagiti tattao wenno ayup nga addaan ti sakit.
Rumrummuar a ti virus ket maysa a “zoonotic disease” a naggapu iti ayup ken mabalin a maipasa iti tao.
Naballaagan ti publiko no adda ti sintomas, insigida nga agpakonsultar iti kaasitgan nga health center iti nasao a lugar.
