LAOAG CITY – Inbinsa-binsa ni Bombo International News Correspondent (BINC) Michael Causing iti Bangkok, Thailand dagiti kalikagom da iti panagturong ni Presidente Ferdinand Bongbong Marcos Jr. iti nadakamat a pagilyan.
Segun ken ni Causing, karaman kadagiti kalikagom da a mapagsaritaan ti gobierno ti Thailand ken ni Presidente Marcos ket ti pannakabukel ti katulagan para iti saan a basta pannakaikkat iti trabaho dagiti Pilipino a mapan agisuro iti nasao a pagilyan.
Inlawlawag na nga iti uneg ti 10 a tawen na idiay Thailand ket naobserbaran na a dagiti mangisursuro a Pilipino ket saan da pulos a mairupir ti kalintegan da no kayat nga ikkaten ti pagpapaayan da a pagadalan uray saan pay a nalpas ti kontrata da.
Inpetteng na nga awan ti maaramidan dagiti Pilipino a mangisursuro gapu ta awan ti katulagan ti Pilipinas ken Thailand seknan iti daytoy a banag.
Malaksid iti daytoy, kuna ni Causing a kalikagom da pay a maipatungpal ti standardization a sweldo para kadakuada nga Overseas Filipino Workers (OFWs) idiay Thailand.
Uray dagiti benepisyo a rumbeng a maipaay kadakuada ken pannakaipaay ti naan-anay a proteksyon da ket namnamaen da a mapagsaritaan ti gobierno ti Pilipinas ken Thailand iti ibibisita ni Presidente Marcos.
Kabayatanna, kuna ni Causing a no maikkan ti gundaway a makisarita ken ni Presidente Marcos ket saludsuden na kenkuana no ania dagiti mabalin nga ipatungpal na a programa para kadagiti distress Overseas Filipino Workers (OFWs) idiay Thailand.
Inyarig ni Causing a no adda ti matay, mapagawid wenno maospital nga Overseas Filipino Worker idiay Thailand, ania dagiti maitulong ti gobierno ti Pilipinas.
