LAOAG CITY – Nakuryente ti maysa nga Overseas Filipino Worker iti Barangay 23 San Andres iti ili ti Sarrat.
Segun ken ni P/Capt. Ashley Cacayorin, Hepe ti Sarrat Municipal Police Station, ti biktima ket agtawen ti 43 ken residente iti nasao a barangay.
Inbatadna a basar iti inwayatda nga imbestigasion, manarimaan ti panangiyurnos ti antenna ti biktima iti ruar ti pagtaenganda ket ditoy nga aksidente a nasagidna ti maysa a live electrical wire a nangitunda ti pannakakuryentena.
Gapu iti daytoy, nagsagaba ti sugat iti nagduduma a paset ti bagi ti biktima ken insigida a naitaray iti Gov. Roque B. Ablan Sr. Memorial Hospital para iti naan-anay a pannakatamingna.
