LAOAG CITY – Inbatad ni Jordan Clarkson a kalikagumna a mangirepresentar ti Gilas Pilipinas iti FIBA World Cup bayat ti agtultuloy a kampanya dagiti Filipinos iti qualification campaign.
Iti maysa nga interview ti GQ Philippines, dinakamat ti NBA veteran a kalikagumna manen ti agay-ayam iti national team iti FIBA World Cup.
Segun ken ni Clarkson, ti panagay-ayamna para iti pagilian a Pilipinas ket nangted kenkuana ti sabsabali a ragsak iso ti gapuna a kalikagumna manen ti agay-ayam tapno irepresentar ti Pilipinas.
Maipalagip a ni Clarkson ti nagbalin a main offensive weapon ti Gilas Pilipinas idi 2023 FIBA World Cup, no sadinno ket ditoy Pilipinas ti nakaangayan dagiti sumagmamano a laban dagiti basketbolista iti intero a lubong.
Iti agdama, addaan ti Gilas ti 4-4 record iti Group E kalpasan ti panagballigida iti Window 4 iti Mall of Asia Arena kalpasan ti 82-81 overtime win-da iti Jordan ken 68-56 victory kontra iti Iran.
