LAOAG CITY – Umabot iti sumurok-kumurang dua a milyon a pisos a balor ti abono ti inpaay ti lokal a gobierno ti ili ti Solsona kadagiti mannalon ti tabako.
Segun kenni Engr. Ranieson Narciso, mangidadaulo ti Agtilculture Office iti ili ti Solsona, 64 a mannalon ti nabenepisyaran iti daytoy.
Inbatad na panangipakita daytoy iti agtultuloy a suporta ti lokal a gobierno nangruna ket ita a bulan ti Nobiembre ti panangrugi manen ti panagmula ti tabako.
Kunana a 30 nga ektarya ti manarimaan a mamulmulaan ti tabako ken mangnamnama a manayunan ken ngumato met ti mapastrek ti ili ken ado nga umili ti mabenepisyaran iti tobacco farming.
Kabayatanna, kuna ni Narciso a dakkel a karit ita a panawen ti amihan ti posibilidad a madadael dagiti mula ngem mangnamnama a saan unay a maapektaran dagiti mannalon.
