LAOAG CITY – Inpetteng ni Mr. Ricky Rapol a desidido ti pamilya na a mangipila ti reklamo kontra kadagiti pulis kalpasan ti pannakapaltog ti anak na bayat ti operasyon idiay Barangay Davila iti ili ti Pasuquin.
Segun kenni Rapol, naibaga kenkuana ti asawa na a gapo iti paltog ti nakasugatan ti patong, kimmot ken takyag ti biktima a ni Reynald Rapol basar ti palawag kadakuada ti doktor iti ospital ditoy ciudad ti Laoag.
Kunana pay nga iti patong ti biktima ket adda ti nabati a buli ken daytoy ti usaren da a maysa nga ebidensya kontra kadagiti maseknan a pulis.
Inbatad na kamkamaten ti pulis ti anak na ken idi nakadanon ti biktima iti balay da ket ditoy a naamoan da nga adda ti sugat na ken arig na maibusanen ti dara.
Kabayatanna, kuna pay ti kabsat ti biktima nga agtawen ti 12 a nakita na a mismo a nagpaputok ti paltog dagiti pulis.
Mainaig iti daytoy, saan pay a makumpirmaran ni Police Lt. Ralph Dayag, chief of police ti PNP-Pasuquin no nagpaputok ti paltog dagiti pulis iti operasyon idiay Brgy. Davila iti nasao nga ili.
Nupay kasta, kunana nga iti inisyal nga imbestigasyon ken panagdamag da kadagiti tattao iti lugar ket awan ti nangeg da a nagpaputok ti paltog.
Segun kenni Dayag, awan isuna iti posisyon a mangibaga no napaltogan ti biktima a ni Reynald Rapol iti nasao a barangay.
Nagkedked met a nanginagan ni Dayag kadagiti dua a pulis a maak-akusaran.
Nakumpiskar da iti nakapasamakan ti insidente ti maysa a set ti baraha ken 280 a pisos.
Maianig iti daytoy, kuna ti hepe nga iti panagturong na iti ospital ket nakita na nga adda ti sugat ti biktima ngem 1cm laeng ti karabaw na ken mabalin a naisab-it laeng kadagiti nadatem a banag idi nagtartaray ti maseknan.
Kabayatanna, inpasurrender na ti paltog dagiti pulis gapo ta no nagpositibo a paltog ti nakasugatan ti biktima ken dumalan iti gun powder test iti crime lab.
