LAOAG CITY – Inbatad ni Mr. Arturo Tributante Jr. iti Barangay 3 iti ili ti Bacarra a naibilin kadakuada nga agquarantine da kabayatan ti pannakaimansayag ti ina na.
Inyistorya na nga idi rabii ket napan dagiti opisyal ti barangay ken dagiti kameng ti pulisya iti balay da tapno idanun ti nagbalin a pammilin ni Mayor Fritzie dela Cruz-Gapasin nga ag-quarantine da.
Daytoy ket gapu ta atapen da a ti pimmusay nga ina na ket nakakwartoan na ti agtawen ti 77 a baket a suspected covid-19 patient a naiyakar iti Mariano Marcos Memorial Hospital and Medical Center iti ciudad ti Batac.
Inlawlawag na nga idi Abril 15 ket naitaray ti ina na iti Governor Roque Ablan Senior Memorial Hospital (GRASMH) ditoy ciudad ti Laoag kalpasan a nagkapsot daytoy.
Segun kenkuana, ti duktal ti ospital ket bimmaba ti dara ti ina da isut gapuna a nasalinan ti dara.
Nupay kasta, kalpasan ti sumagmamano nga aldaw ket pimmusay ti ina da gapu iti atake iti puso.
Inpakaammo pay ni Tributante a maitabon koman ti ina na intono sabado, Abril 25 ngem gapu iti panag-quarantine da ket saanda a sigurado no ituloy da wenno itantan da pay laeng.
Innayon na a gapu ta naibilin ti panagquarantine da ket awan payen dagiti mapalubusan a mapan iti balay da tapno makiminatay.
Iti agdama, iyur-uray ti pamilya Tributante ti resulta ti swab test ti suspected covid-19 patient ken mangnamnama a negatibo ti resulta na tapno maasikaso dan a naimbag ti pannakaitabon ti ina na.
Saan da pay nga ammo no ituloy wenno itantan da pay laeng ti panangipunpon da iti ina na.
