LAOAG CITY – Inpasigurado ti Malacañang nga addan to naiget a panangbaybay ti gobierno nasional iti panaggastos ken panagusar ti Local Government Support Fund (LGSF) tapno malappedan ti aniaman a klase ti panag-abuso iti pondo ti ili wenno siudad.
Basar ken ni Palace Press Officer Undersecretary Claire Castro a saan nga agleppas ti panangibunong ti pondo ti responsibilidad ti nasional a gobierno kadagiti local government unit (LGU).
Nailatang dagitoy a pondo para iti nagduduma a public projects kas ti imprastraktura, farm-to-market roads, water systems, heath care centers, disaster resiliency, ken tulong kadagiti marigrigat a sektor.
Immabot ti P57.8 billion ti pondo nga inlatang para iti Local Government Support Fund (LGSF) ita a tawen kabayatan nga inrekomendar daytoy nga ingato iti P58.53 billion inton 2027.
Pakairamanan ti agbenipisio iti daytoy ti Bagong Pilipinas Rice Program a gagemna a mangipaay ti 10 kilo a libre a bagas iti kada dua a bulan iti mapatta-patta nga 8 million a pamilia a Pilipino.
Mainaig iti daytoy, inbatad ni Executive Secretary Ralph Recto a manamnama a ngumato iti P1.4 trillion ti National Tax Allotment iti 2027 no sadinno P676.9 billion iti daytoy ket nailatang para kadagiti local government units (LGU) iti Luzon.
Kabayatanna, kuna ni Castro a ti panagngato iti Local Government Support Fund (LGSF) ket direkta a sungbat kadagiti kasapulan ken kiddaw nga inpatulod dagiti lokal a mangidadaulo ken ni Presidente Ferdinand Marcos Jr.
