LAOAG CITY – Inyarig ni Police Col. Ysmael Yu, deputy regional director for operation iti PNP Regional Office 1 a sugal iti panaglako iti iligal a paputok dua nga aldaw sakbay ti panangsarabo ti baro a tawen.
Kuna na nga adu dagiti nalalaing nga agilimed iti panaglako ti iligal a paputok gapu ta kayat da iti makalako ti dakkel a gatad.
Segun kenni Yu, daytoy nga aramid ket maikanniwas iti paglintegan ngem mamati nga aramiden da ti kabaelan da tapno makalako da ti iligal a paputok.
Mamati nga agpasuksok dagiti maseknan kadagiti ammok da a mangtiliw kadakuada nga otoridad.
Inadmitir ni Yu nga adda dagiti pulis a maip-ipit gapu iti nakadawyan dagiti agsalsalungasing iti paglintegan a mangted ti pasuksok ken adda ti agipangta.
Inbatad na a kaaduan laeng a maaramidan ti PNP ket pannakakumpiskar laeng kadagiti iligal a paputok ken awan dagiti maikaso a negosyante.
Innayon ni Yu a magun-od laeng ti PNP dagiti kalikagum da a panagtalna ti maysa a lugar, pannakaipaay ti proteksiyon iti publiko ken pannakapagtalinaed ti kapya no adda iti 100 a porsiento a panagkammayet ti publiko ken kumunidad.
